Útsvarsprósentan í Reykjavík verður lækkuð í 13,98% í fjórum þrepum á næstu fjórum árum komist Sjálfstæðisflokkurinn í meirihluta í borgarstjórn.
Þetta kom fram á blaðamannafundi sem Bjarni Benediktsson, fjármálaráðherra og formaður Sjálfstæðisflokksins og Eyþór Arnalds, oddviti Sjálfstæðisflokksins í Reykjavík, boðuðu til í Marshall-húsinu á Granda í dag.
Í dag er Reykjavík með hæsta leyfilega útsvar á landinu, eða 14,52%. Með þessu hækka útborguð laun borgarbúa og íbúar borgarinnar geta sjálfir ákveðið hvernig mismuninum er varið.
Greiðari samgöngur
Sjálfstæðisflokkurinn vill Sundabraut aftur á samgönguáætlun og vill vinna að hagkvæmustu útfærslu með Vegagerðinni. Þá telur flokkurinn rétt að skoða möguleika á einkaframkvæmd til að flýta fyrir verkefninu.
Á fundi Bjarna og Eyþórs kom einnig fram að flokkurinn vill fækka ljósstýrðum gatnamótum í Reykjavík og greiða þannig leið fólks um borgina. Þetta gagnast jafnt almenningssamgöngum og þeim sem ferðast um að eigin bíl.
Fram kom að brýnast er að ráðast í úrbætur á gatnamótum við Bústaðaveg, Kringlumýrabraut, Háaleitisbraut og Grensásveg en þau eru á meðal hættulegustu gatnamóta á Íslandi.
Flokkurinn vill einnig stytta ferðatíma strætó með sérakgreinum þannig að borgarbúar geti haft raunverulegt val um að ferðast með almenningssamgöngum.
Þá var á fundinum kynnt sú hugmynd að fara í tilraunaverkefni sem hvetji til samflots á sérakgreinum þannig að þeir sem ferðist saman þrír eða fleiri megi nota sérakgreinar.
Uppbygging á Keldum verði að veruleika.
Sjálfstæðisflokkurinn vill að landsvæðið við Keldur sem er rúmlega 100 hektarar og nú í eigu ríkisins verði byggt upp. Þar verði í bland byggðar upp íbúðir, atvinnustarfsemi og stofnunum fengnar þar lóðir.
Með þessu gefst fleirum tækifæri á að búa og starfa austarlega í borginni, umferð jafnast á álagstímum og betra jafnvægi næst í skipulag borgarinnar.
