Mörgum rennur kalt vatn milli skinns og hörunds vegna ástandsins í Tyrklandi og er ekki að undra. Tyrkland er eitt af 28 aðildarþjóðum Atlantshafsbandalagsins og eftir að misheppnuð valdaránstilraun var gerð þar á dögunum herðir Erdogan forseti landsins tök sín til muna. Ný neyðarlög sem hafa verið sett gefa honum gríðarleg völd sem gera hann nánast einráðan. Í landinu fara fram miklar hreinsanir í stjórnkerfinu og í skólakerfinu þar sem meintir andstæðingar forsetans eru reknir og aðrir honum hiðhollir settir í staðinn. Enginn veit hvaða áhrif ástandið í Tyrklandi mun hafa á varnar- og öryggismál í Evrópu og samvinnuna innan NATO.

Hvaða mann hefur Erdogan að geyma?

Hver eru helstu persónueinkenni hins 62 ára Tayyip Erdogan? Sumir sérfræðingar lýsa honum sem árásargjörnum manni sem þrífst á stöðugum pólitískum árekstrum sem sýni keppinautum sínum enga miskunn.

Aðrir sjá hann sem leiðtoga með mikla persónutöfra og raunhæf markmið; leiðtoga sem getur blásið stuðningsmönnum sínum baráttuanda í brjóst. Loks eru þeir sem segja að Erdogan sé úlfur í sauðagæru sem bíði eftir næsta tækifæri til að hrinda í framkvæmd áætlunum sínum um að koma á einræði.

Hvað sem má um persónuleika Erdogans segja þá veit það ekki á gott þegar stjórnmálamaður í æðstu stöðu er eins hégómlegur og viðkvæmur fyrir eigin persónu og raun ber vitni með Erdogan. Samkvæmt tyrkneskum lögum frá 1926 er nefnilega ólöglegt að móðga forseta landsins, en mjög sjaldgæft var að á lagabókstafinn væri látið reyna fyrr en Erdogan tók við völdum.

Ólöglegt að móðga forsetann

Tyrkland er afar mikilvægt ríki innan NATO og því gríðarlegir hagsmunir fyrir Ísland sem og önnur ríki sem eiga aðild að Atlantshafsbandalaginu að þar sé stjórnarfar að hætti lýðræðisríkja, en margt horfir því miður í aðra átt.