Sjálfstæðisfélögin í Fjarðabyggð hafa gefið út fyrsta tölublað Urðarbrunns, nýs málefnablaðs sem markar upphaf nýrra tíma í kynningu á starfi flokksins í sveitarfélaginu. Blaðið var gefið út 26. febrúar 2025 og ritstjóri þess er Magni Harðarson. Blaðið má nálgast hér.
Í leiðara blaðsins er lögð áhersla á að birta kraftinn og árangurinn sem Sjálfstæðisflokkurinn hefur náð í meirihluta bæjarstjórnar. Þar kemur fram að mikil áhersla hefur verið lögð á trausta fjármálastjórn, innviðauppbyggingu og fjölbreytta þjónustu fyrir íbúa.
Meðal helstu málefna sem fjallað er um í þessu fyrsta tölublaði eru:
- Ljósleiðaravæðing Fjarðabyggðar – Markmið sveitarfélagsins er að tryggja háhraðatengingar fyrir alla íbúa og atvinnulíf.
- Nýr miðbæjarkjarni á Reyðarfirði – Í undirbúningi er metnaðarfull uppbygging á svæðinu við smábátahöfnina, þar sem verður gisting, veitingastaðir og samfélagsrými.
- Styrking Stöðvarfjarðar – Leitað er lausna í samstarfi við íbúa til að efla samfélagið og styrkja byggðina.
- Fjárhagsstaða Fjarðabyggðar – Kynntar eru áætlanir um skuldaaðlögun og auknar fjárfestingar í innviðum.
- Viðtal við Ragnar Sigurðsson, oddvita Sjálfstæðisflokksins í Fjarðabyggð – Þar fer hann yfir framtíðarsýn flokksins og helstu stefnumál.
Blaðið leggur mikla áherslu á samfélagslega uppbyggingu, nýsköpun og þátttöku ungs fólks í stjórnmálum. Þar er einnig að finna viðtöl við bæjarfulltrúa flokksins, greinar um menningar- og íþróttamál, auk þess sem rætt er um mikilvægi efnahagslegs stöðugleika í sveitarfélaginu.
Útgáfa Urðarbrunns sýnir vilja Sjálfstæðisflokksins í Fjarðabyggð til að miðla upplýsingum til íbúa, halda opinni umræðu um stefnumál og hvetja fólk til þátttöku í samfélagsmálum. Með blaðinu er flokkurinn að leggja áherslu á uppbyggingu og öflugt samfélag í Fjarðabyggð.
