Áslaug Arna Sigurbjörnsdóttir háskóla-, iðnaðar- og nýsköpunarráðherra:
Stóra plan Samfylkingarinnar í kosningabaráttunni snýr að því að hækka skatta þó undir því yfirskini að eingöngu sé verið að tala um „þá sem hafi breiðari bök.“ Svo virðist sem spjótum Samfylkingarinnar sé þó fyrst og fremst beint að venjulegu, vinnandi fólki.
Markmiðið er að skapa þau hughrif að fjármagnseigendum sé hyglað á kostnað venjulegs fólks – almennings í landinu. Þvæld orðræða Samfylkingarfólks brýst út í hannaðri hugtakanotkun á borð við „ehf.-gatið“ svokallaða og „glufur“ sem frambjóðendur Samfylkingar vilja taka sig saman um að loka.
Ef við lítum framhjá orðskrúðinu og skoðum kjarna málsins, þá vill Samfylkingin takmarka möguleika fólks sem stendur í eigin rekstri að telja fram launatekjur sem fjármagnstekjur. Forsendur tillagnanna hljóta því að gera ráð fyrir því að skattalegt hagræði fáist af því. Engu slíku er þó fyrir að fara og í raun eru þessu öfugt farið. Samfylkingarmaðurinn Víðir Reynisson heldur því fram í gær fram að hið meinta „ehf.-gat“ snúist um að jafna skattbyrði af 1.300 þúsund króna tekjum hvort sem þær fást greiddar sem launatekjur eða í gegnum rekstur einkahlutafélags.
Fjármagn sem tekið er út úr félagi sem arður ber þegar allt er talið til hærri skatt en hefðbundin laun. Tökum dæmi. Af 1.300 þúsund króna launum nemur virk skattprósenta 31% og fær viðkomandi 897 þúsund krónur í vasann. Greiði sami einstaklingur sér jafn háar tekjur í gegnum ehf.-félagið sitt þarf hann fyrst að greiða 21% fyrirtækjaskatt af hagnaði félagsins og svo 22% fjármagnstekjuskatt þegar fjármagnið er tekið úr rekstrinum. Í því tilfelli nemur virka skattprósentan 38,4% og fær hann 800 þúsund krónur í vasann.
Ekki verður annað séð af tillögum þeirra en að tilgangurinn sé að slá ódýrar pólitískar keilur. Slíkar æfingar höfum við öll séð áður í kosningabaráttu. Verra er þegar þeir sem standa í sjálfstæðum rekstri – langflestir í litlum fyrirtækjum – fá ekki að njóta sannmælis um framlag sitt til samfélagsins.
Það eru gild rök fyrir því að píparar, smiðir, rafvirkjar, hárgreiðslumeistarar, bakarar og aðrir iðnaðarmenn stofni einkahlutafélag utan um þjónustu sína eða rekstur. Það sama má segja um forritara, ráðgjafa, hönnuði, bókara og fleiri.
Eftiráskýringar Samfylkingarinnar standast enga skoðun. Málflutningur þeirra snýst öðru fremur um að hafa horn í síðu þeirra sem skapa, taka áhættu og ná árangri í störfum sínum.
Svo ég tileinki mér orðfæri Samfylkingarinnar, þá vill Sjálfstæðisflokkurinn stækka „ehf.-gatið“. Framtíðarsýn okkar er sú að auðvelda hugmyndaríku og drífandi fólki að stofna fyrirtæki og lækka skatta. Við eigum að bera virðingu fyrir vinnandi fólki og mikilvægu framlagi þess til samfélagsins. Við eigum að leyfa fólki að njóta árangurs af erfiði sínu, en ekki boða „plön“ sem þeim er síðan ætlað að greiða fyrir.
Greinin birtist í Morgunblaðinu 11. nóvember 2024.
