Diljá Mist Einarsdóttir, þingmaður Sjálfstæðisflokksins og formaður efnahags- og viðskiptanefndar Alþingis:
Árið 1988 gengu í gildi breytingar á tekjuskattslögum sem höfðu það m.a. að meginmarkmiði að skattbyrði héldist sem næst óbreytt. Meðal breytinganna sem voru gerðar til einföldunar var að fella niður frádráttarbærni iðgjalda til lífeyrissjóða. Persónuafsláttur og lægri skatthlutföll áttu síðan að skila skattborgurum sömu niðurstöðu og frádráttarreglurnar höfðu gert áður. Þessar breytingar ollu nokkurri óánægju og samþykkti Alþingi m.a. árið 1991 þingsályktunartillögu Guðmundar H. Garðarssonar þingmanns Sjálfstæðisflokksins um skattalega meðferð á lífeyrissparnaði sem sneri m.a. að þessu atriði. Árið 1994 lögðu þrír þingmenn Sjálfstæðisflokksins, Guðmundur Hallvarðsson, Sólveig Pétursdóttir og Vilhjálmur Egilsson, fram tillögu til þingsályktunar um afnám tvísköttunar á lífeyrisgreiðslum. Árið 1994 náðist loks samkomulag um að breyta þessu fyrirkomulagi. Tekjuskattur á inngreiðslur í lífeyrissjóði var síðan með öllu afnuminn 1. júlí 1997, en árin 1995 og 1996 hafði hluti inngreiðslna verið frádráttarbær frá tekjuskattsstofni.
Við fyrrgreindar breytingar á tekjuskattslögum, þegar staðgreiðslu skatta var komið á, var tekjuskattur lagður á þær tekjur sem launþegi greiddi sem iðgjald í lífeyrissjóð og lífeyririnn var síðan skattlagður aftur við útgreiðslu. Því er hægt að færa fyrir því rök að við þetta hafi tvísköttun hafist á lífeyri.
Kerfið sem sneri að tvísköttun tekna var vissulega lagfært í skrefum á árunum 1995 til 1997. Eftir stendur óuppgert óréttlæti sem þeir einstaklingar búa við sem greiddu iðgjöld á þessum árum og greiða svo tekjuskatt á ný við útgreiðslu. Baráttufólk fyrir réttindum eldra fólks hefur lengi bent á þetta misrétti, m.a. Ingibjörg Sverrisdóttir, fyrrverandi formaður Félags eldri borgara í Reykjavík og nágrenni.
Ég hef því lagt fram tillögu til þingsályktunar, ásamt hópi sjálfstæðismanna, um bætur vegna tvísköttunar lífeyrisgreiðslna. Við teljum það réttlætismál að borgarar greiði ekki tvöfaldan tekjuskatt af sömu tekjum. Þar sem það liggur fyrir að útkoman var með þeim hætti vegna kerfis sem var við lýði á framangreindum árum teljum við sanngjarnt að umræddum einstaklingum verði bætt oftakan. Því leggjum við til að vinna verði hafin við gerð frumvarps með þetta að markmiði.
