Áslaug Arna Sigurbjörnsdóttir háskóla-, iðnaðar- og nýsköpunarráðherra:

Á tíma­mót­um tækni­fram­fara stönd­um við gjarn­an frammi fyr­ir augna­blik­um sem geta virkað óraun­veru­leg í eðli sínu. Fáir hefðu lík­lega tekið al­var­lega full­yrðing­ar árið 2019 um að árið 2024 þætti fólki orðið sjálfsagt að geta beðið gervi­greind um að hjálpa sér að skipu­leggja dag­inn sinn, setja upp mataráætl­un, skrifa fyr­ir sig pistla, for­rita litla tölvu­leiki án for­rit­un­arþekk­ing­ar eða búa til stutt mynd­bönd út frá ein­föld­um lýs­ing­um.

Jen­sen Huang er for­stjóri Nvidia sem er það fyr­ir­tæki sem jók mest tekj­ur sín­ar í heim­in­um síðastliðið ár. Fyr­ir­tækið smíðar tölvukubba og þróar tækni sem er notuð fyr­ir gervi­greind. Huang sagði í viðtali ný­lega að þökk sé gervi­greind gætu all­ir í dag verið for­rit­ar­ar vegna þess að tungu­málið hefði verið gert aðgengi­legt og væri nú „tungu­mál manns­ins“. Huang hélt áfram og sagði að fram und­an væri tími þar sem þeir ein­stak­ling­ar sem hafa góða þekk­ingu á sínu sér­sviði, t.d. á sviði mennt­un­ar eða land­búnaðar, gætu stór­aukið af­köst sín og virði, svo gott sem á einni nóttu. Eina sem til þarf er tölva eða sími og in­ter­netaðgang­ur. Huang lýs­ir þessu ferli sem „gleðilegri upp­sköl­un mann­eskj­unn­ar“ (e. delig­ht­f­ul upscal­ing of hum­ans).

Gervi­greind er ekki að koma í stað fólks; hún magn­ar upp getu okk­ar á ákveðnum sviðum og ger­ir okk­ur kleift að gera meira og bet­ur. Gervi­greind­in er ekki að taka yfir störf for­rit­ara, held­ur eyk­ur hún hraða og skil­virkni þeirra. Gervi­greind mun ekki koma í staðinn fyr­ir lækna, en auðveld­ar grein­ing­ar og meðferðir með auk­inni ná­kvæmni og veit­ir þeim meiri tíma til að sinna sjúk­ling­um bet­ur. Gervi­greind kem­ur held­ur ekki í stað kenn­ara, en mun geta boðið upp á sér­sniðna nálg­un sem hægt er að aðlaga þörf­um hvers nem­anda, gera námið ár­ang­urs­rík­ara og ein­stak­lings­miðaðra.

Svona má áfram telja.

Við meg­um ekki leyfa áhyggj­um af nei­kvæðum hliðum tækn­inn­ar byrgja okk­ur sýn á tæki­fær­in sem hún býður upp á. Þó að við séum vak­andi fyr­ir hætt­un­um. Við þurf­um að horfa til þess hvernig við get­um nýtt tækn­ina til að bæta sam­keppn­is­hæfni okk­ar og efla okk­ur sem mann­eskj­ur.

Ísland er í ein­stakri stöðu til að vera fremst meðal þjóða, hvergi hef­ur t.d. fólk betra aðgengi að há­hraðain­ter­neti en hér. Gervi­greind get­ur fært okk­ur auk­in tæki­færi til að fram­kvæma það sem marga hef­ur lengi aðeins dreymt um, gert hluti bet­ur og hraðar. En líka gefið okk­ur auk­inn tíma til að gera allt það sem tækn­in mun aldrei geta.

Þegar kem­ur rekstri rík­is­ins býður gervi­greind­in líka upp á enda­lausa mögu­leika til að ein­falda reglu­verk, bæta þjón­ustu og draga úr kostnaði. Við ætl­um að tryggja að Ísland sé sam­keppn­is­hæft og geti nýtt sér tækn­ina til að bæta lífs­gæði.

Þessi pist­ill er skrifaður með hjálp gervi­greind­ar.

Greinin birtist í Morgunblaðinu 18. mars 2024.