Hópur fólks skvetti rauðu glimmeri á Bjarna Benediktsson formann Sjálfstæðisflokksins og utanríkisráðherra síðastliðinn föstudag á hátíðarfundi í Veröld, húsi Vigdísar. Bjarni var þar mættur til að flytja lokaávarp á fundi sem haldinn var í tilefni af 75 ára afmæli mannréttindayfirlýsingar Sameinuðu þjóðanna.
Hópurinn var mættur á staðinn til að krefjast þess að Ísland myndi slíta stjórnmálasambandi við Ísrael og setja viðskiptabann á ríkið skv. því sem stóð á borðum sem fólkið hélt á.
„Mér finnst réttur fólks til þess að mótmæla vera ákveðin grundvallarmannréttindi, sem ég mun alltaf verja, en mér finnst ekki fara vel á því að fólk yfirtaki viðburði, sem að til dæmis í þessu tilviki átti að fjalla um mannréttindasáttmála Sameinuðu þjóðanna og 75 ára afmæli þeirrar yfirlýsingar. Almennt finnst mér bara gott að fólk tali saman og öskri ekki á hvert annað,“ sagði Bjarni í viðtali við mbl.is – sjá nánar hér.
Fundurinn leystist upp í kjölfarið atviksins.
Bjarna varð ekki meint af atvikinu en nær fordæmalaust er að ráðist sé að ráðamönnum þjóðarinnar með þessum hætti.