Marta Guðjónsdóttir, borgarfulltrúi Sjálfstæðisflokksins í Reykjavík bar upp tillögu um hagræðingu í málefnum upplýsingafulltrúa Reykjavíkurborgar í seinni umræðu um fjárhagsáætlun í borgarstjórn í vikunni.

Tillagan laut að því að leggja niður skrifstofu samskiptateymis borgarinnar og ná niður kostnaði og hagræða um 130 milljónir árlega. Í tillögunni var tiltekið að sautján upplýsingafulltrúar ynnu hjá borginni sem gæfu út efni fyrir Reykjavíkurborg.

„All­ur þessi fjöldi er á pari við stóra frétta­stofu og maður spyr sig hvort þörf sé á því að Reykja­vík­ur­borg haldi úti rekstri rit­stjórn­ar­skrif­stofu og hvert sé mark­miðið með þeirri starf­semi þegar hægt væri að út­vista þess­um rekstri með tölu­vert minni kostnaði. Rekst­ur rit­stjórn­ar­skrif­stofu er ekki hluti af grunnþjónustu né lög­bund­inni þjón­ustu þannig að hér er aug­ljós­lega hægt að hagræða,“ sagði Marta Guðjónsdóttir, borgarfulltrúi m.a. í ræðu sinni.

Eva Bergþóra Guðbergsdóttir samskiptastjóri Reykjavíkurborgar segir þessar upplýsingar ekki réttar, ekki starfi 17 upplýsingafulltrúar heldur tíu. Auk þessara tíu upplýsingafulltrúa væru hins vegar sex starfs­menn hjá sam­skiptateymi Ráðhúss­ins sem ekki væri rétt að nefna upp­lýs­inga­full­trúa heldur væru verk­efna­stjór­ar viðburða, ljós­mynd­ari, vef­stjóri, einn sem sinn­ir efn­is­gerð og einn sem sinn­ir mynd­bands­gerð til fræðslu.

„Þetta  svar borgarinnar er ekkert annað en yfirklór. Samkvæmt því eru ekki sautján upplýsingafulltrúar sem starfa hjá Reykjavíkurborg heldur tíu plús sex sem starfa við upplýsingamiðlun. Ég fæ ekki séð hverju þetta breytir í stóra samhenginu – til hægðarauka var talað um upplýsingafulltrúa en ég tel að borgarbúar geri ekki greinarmun á upplýsingafulltrúa eða aðilum sem starfa við upplýsingamiðlun. Kjarni málsins er þessi:  það starfa 17 manns við upplýsingamiðlun í borgarkerfinu og þá eru ekki taldir með upplýsingafulltrúar hjá fyrirtækjum borgarinnar eins og t.d. upplýsingafulltrúar Orkuveitunnar. Þessum 17 upplýsingafulltrúum fækkar ekki auk þess sem kostnaðurinn minnkar ekki við það að borgaryfirvöld ákveði að skilgreina starf þeirra á annan hátt,“ sagði Marta.