Bjarni Benediktsson, fjármálaráðherra og formaður Sjálfstæðisflokksins, segir enga sérstaka þörf fyrir ríkisrekstur hvað við kemur áfengissölu, að því er fram kemur í viðtali við hann á mbl.is í dag.
„Tímarnir hafa hins vegar breyst svo mikið. Svo dæmi sé tekið þá er ólíku saman að jafna að tala um áfengi í dag og fyrir einhverjum áratugum hvað vínveitingaleyfi varðar. Fyrir nokkrum áratugum voru þau ekki nema brot af því sem þau eru í dag. Nú er hægt að nálgast vínveitingar um allt land og með allt öðrum hætti en áður var,“ sagði Bjarni í samtali við mbl.is, en hann telur frumvarp Jóns Gunnarssonar, f.v. dómsmálaráðherra, um netsölu áfengis ekki vera „dautt“ og að það eigi jafnvel meira erindi nú en þegar það hafi verið lagt fram á fyrri stigum.
„Ég held að fleiri hafi séð núna að það er mikilvægt að þetta mál fái afgreiðslu. Ég held að það sé meiri þörf fyrir þetta mál heldur en þegar það kom fyrst fram ef eitthvað er,“ segir Bjarni.
„En svo er ágætt að taka fram að ég sé ekki þörf fyrir ríkisrekstur á þessu sviði til að við náum markmiðum um lýðheilsu og önnur markmið sem að fylgja lögum um að fara beri með aðgát þegar um áfengi er að ræða. Öllum þeim markmiðum er hægt að ná. Án þess að vera með ríkisrekstur þar að baki,“ segir Bjarni.