Sveitarstjórnarkosningarnar 14. maí skiluðu Sjálfstæðisflokknum langflestum sveitarstjórnarmönnum allra flokka.
Sjálfstæðisflokkurinn var ótvíræður sigurvegari kosninganna, hlaut 113 sveitarstjórnarmenn kjörna af 323 mögulegum í þeim 35 sveitarfélögum þar sem hann bauð fram.
Flokkurinn sem hlaut annað sætið bauð fram í 21 sveitarfélagi og hlaut 67 kjörna fulltrúa, árangur sem vert er að óska þeim til hamingju með, en kemst þó hvergi nærri gríðargóðum árangri Sjálfstæðisflokksins.
![](https://xd.is/wp-content/plugins/lazy-load/images/1x1.trans.gif)
Valdir fulltrúar flokka á öllu landinu (í þeim sveitarfélögum þar sem Sjálfstæðisflokkur bauð fram eru 323 sveitarstjórnarmenn).
Sjálfstæðisflokkurinn er langstærsti flokkurinn með langflesta sveitarstjórnarmenn eða 113. Að meðaltali nutu framboð Sjálfstæðisflokksins tæplega 37% fylgis í þeim sveitarfélögum sem hann bauð fram í eða rétt rúmum 3% minna en árið 2018 þegar hann hlaut mjög góða kosningu. Næststærsti flokkurinn naut fylgis um 28,5% að meðaltali þar sem hann bauð fram. Sjálfstæðisflokkurinn er stærsti flokkurinn í 21 sveitarfélagi af 35, og víða langstærstur. Sjálfstæðisflokkurinn er með hreinan meirihluta í 7 sveitarfélögum.
Í Reykjavík var flokkurinn langstærstur eða fimmtungi stærri en næststærsti flokkurinn. Það þýðir að fjórði hver íbúi í Reykjavík treystir Sjálfstæðisflokknum til þess að leiða breytingar á borginni og við felldum meirihlutann í annað skiptið í röð!
Þessar tölur sýna, svo ekki verður um villst, að Sjálfstæðisflokkurinn er augljós sigurvegari kosninganna enda langt fyrir ofan annað sætið í öllum samanburði.
Að lokum er gaman að segja frá þeirri staðreynd að af 614 öflugum frambjóðendum flokksins um allt land voru 304 konur og 310 karlar.
![](https://xd.is/wp-content/plugins/lazy-load/images/1x1.trans.gif)
Þessi góði árangur kemur ekki á óvart, enda var áberandi samheldni einstaklega kraftmikils hóps frambjóðenda um allt land, trúnaðarmanna, sjálfboðaliða og flokksmanna sem lögðu flokknum lið í þessari mikilvægu baráttu. Fólk lagði dag við nótt í þessari vinnu, sem einkenndist af gleði, vinnusemi og jákvæðum baráttuanda.