Diljá Mist Einarsdóttir alþingismaður skipar 2. sæti á lista Sjálfstæðisflokksins í Reykjavík norður:
Á laugardaginn leggjum við sjálfstæðismenn störf okkar í dóm kjósenda, störf sem við erum stolt af. Eldri sjálfstæðismaður sagði við mig á dögunum að honum heyrðust einhverjir vilja gefa Sjálfstæðisflokknum frí, m.a. rótgrónir sjálfstæðismenn. Hann rifjaði upp umskiptin á íslensku samfélagi undanfarna áratugi sem hefðu verið leidd af Sjálfstæðisflokknum. Það væri ekki til betri ástæða til að gefa Sjálfstæðisflokknum áfram umboð en einmitt sú þróun.
Lifir Sjálfstæðisflokkurinn á fornri frægð?
En við sjálfstæðismenn getum ekki endalaust rifjað upp hitaveituvæðinguna, stofnun og uppbyggingu Landsvirkjunar og frelsi í gjaldeyris- og viðskiptamálum, inngönguna í EES og NATO, svo fátt eitt sé nefnt.
Á yfirstandandi kjörtímabili höfum við náð miklum árangri í þeim málaflokkum sem við höfum haldið á, þótt einhverjir séu fúlir yfir málamiðlunum í öðrum.
Við náðum undraverðum árangri í orkumálum á skömmum tíma, m.a. með samþykki rammaáætlunar, stóreinföldun leyfisveitinga, fyrsta jarðhitaleitarátaki aldarinnar og sameiningu stofnana.
Við höfum styrkt landamærin með aukinni landamæravörslu og löggæslueftirliti og breytt forgangsröðun í málaflokki hælisleitenda. Þannig hefur umsóknum um vernd fækkað um yfir 60% milli ára, brottflutningur hefur aukist um yfir 70% og frávísanir á landamærum um 1.200% frá árinu 2022.
Það hefur verið forgangsmál Sjálfstæðisflokksins í ríkisstjórn að stuðla að lækkun verðbólgu svo unnt sé að lækka vexti. Það hefur gengið eftir, verðbólgan er í frjálsu falli og vaxtalækkunarferlið er hafið. Þeirri stöðu verður vonandi ekki ógnað með tilraunastarfsemi og meintum töfralausnum.
Við höfum byggt upp nýja stoð í hagkerfinu með öflugum stuðningi við nýsköpun, rannsóknir og tækni. Það hefur skilað okkur fjölbreyttum störfum og auknum útflutningstekjum.
Við höfum haldið áfram að treysta samstarf okkar við nágranna- og vinaþjóðir. Þar er EES-samstarfið okkur gríðarlega mikilvægt og hagsmunagæsla fyrir Ísland forgangsmál Sjálfstæðisflokksins.
Kjósum um framtíðina
Sjálfstæðisflokkurinn er stoltur af fortíðinni og við lítum líka björtum augum til framtíðar. Við munum tryggja áframhaldandi lækkun verðbólgu og vaxta. Leggja enn meiri áherslu á ábyrgan ríkisrekstur, útboð og tækni til að fara betur með ríkisfé og fækka ríkisstofnunum úr 160 í 100.
Við viljum að fólk geti eignast húsnæði, enda er það það sem flestir vilja. Við ætlum að skylda sveitarfélög á borð við Reykjavíkurborg til að tryggja nægt lóðaframboð og lækka byggingarkostnað með einfaldari reglum og frekari skattaívilnunum.
Við ætlum að halda áfram að létta undir með heimilunum með því að afnema stimpilgjald vegna íbúðarkaupa einstaklinga, tryggja séreignarsparnaðarúrræðið svokallaða og veita barnafjölskyldum 150 þúsund króna skattaafslátt árlega vegna hvers barns undir þriggja ára. Við viljum lækka erfðafjárskatt og hækka frítekjumark erfðafjár.
Við boðum stórsókn og umbreytingu á menntakerfinu – fyrsta kosningamálið sem við kynntum. Við viljum taka aftur upp samræmd próf, nýja aðalnámskrá, betri námsgögn, símalausa skóla og móttökuskóla fyrir börn sem tala ekki íslensku.
Við munum halda áfram að tryggja landamærin sem okkur tókst að ná stjórn á og auka öryggi fólks með öflugri löggæslu. Enginn flokkur hefur staðið eins traustan vörð um þessi mál á Alþingi og Sjálfstæðisflokkurinn. Raunar hefur stjórnarandstaða Samfylkingar og Viðreisnar staðið gegn hertum reglum.
Við leggjum áherslu á aukna nýsköpun, tæknilausnir og fjölbreyttari rekstrarform í heilbrigðisþjónustu. Við þurfum að fá heilbrigðismenntað fólk til baka úr námi með skattaívilnunum. Mannauðsvandinn verður ekki leystur með áætlunum.
Við viljum einfalt regluverk og hóflega skattheimtu fyrir atvinnulífið. Þar er jafnlaunavottunin ofarlega á lista yfir séríslenskar kvaðir á fyrirtæki sem þarf að afnema.
Það á að vera gott að eldast á Íslandi. Við viljum gera starfslok sveigjanleg, hækka frítekjumark vegna atvinnutekna í 350 þúsund á mánuði. Draga áfram úr skerðingum og hækka almennt frítekjumark ellilífeyris.
Við þurfum að stórefla samgöngur um allt land, m.a. með því að heimila sveitarfélögum að stofna samgöngufélög um samfélagsvegi.
Með Sjálfstæðisflokkinn í brúnni hefur Ísland orðið í fararbroddi í langflestum samanburði við önnur lönd. Við viljum gera enn betur og biðjum kjósendur að treysta þeim sem hafa sýnt fram á árangur í verki. Þannig náum við meiri árangri fyrir okkur öll.
Greinin birtist í Morgunblaðinu 28. nóvember 2024.
