Bjarni Benediktsson formaður Sjálfstæðisflokksins og forsætisráðherra var í viðtali í Dagmálum í vikunni. Þar sagði hann ríkisstjórn sína ekki hafa mikinn tíma fyrir sér fram til kosninga. Það blási mönnum hins vegar kapp í kinn. Hann segir brýn verkefni blasa við og að umboð stjórnarflokkanna sé sterkt.
Bjarni segist ekki taka nærri sér undirskriftasöfnun gegn sér. „Það er eðlilegur þáttur í hverju lýðræðisríki að fólk tjái skoðanir sínar,“ segir Bjarni en að mikilvægt sé að við virðum leikreglur lýðræðis og minnir á að samkvæmt þeim hafi verið gengið til kosninga 2021.
„Þá fékk Sjálfstæðisflokkurinn, sem ég er formaður í, flest atkvæði. Það fór enginn þingmaður inn á þing með fleiri atkvæði að baki sér en einmitt ég,“ segir Bjarni. Hann minnir einnig á að hann hafi síðan þá endurnýjað umboð sitt til að leiða flokk sinn.
Hann segist sitja rólegur í trausti þess sterka umboðs sem hann fékk eftir leikreglum lýðræðisins. Menn geti farið í undirskriftasafnanir og mótmælt sér eða hans stefnu. Mönnum sé frjálst að gera það. Hann sé hins vegar óhaggað með gríðarlega sterkt umboð til sinna verka. Við það bætist að stjórnarflokkarnir þrír séu með sterkan meirihluta á þingi.
„Við viljum nota þá stöðu, það góða traust sem hefur byggst upp meðal flokkanna í bráðum sjö ára samstarfi, til að klára kjörtímabilið með bravúr,“ segir Bjarni.
Þáttinn má nálgast hér.