Í dag var borinn til grafar Søren Pape Poulsen formaður Danska íhaldsflokksins, systurflokks Sjálfstæðisflokksins. Søren lést aðeins 52 ára gamall laugardaginn 2. mars sl. Hann fékk alvarlegt heilablóðfall á miðstjórnarfundi flokksins föstudaginn 1. mars.
Það kom fram í jarðarför hans að það síðasta sem hann heyrði í lifanda lífi var lófatak fundarmanna þar sem þeir fögnuðu ræðu hans. Dómkirkjan í Viborg, sem tekur 800 manns í sæti, var smekkfull af vinum og pólitískum samherjum sem og mótherjum sem komnir voru til að kveðja leiðtoga íhaldsmanna.
Søren tók við formennsku í flokknum árið 2014 af Lars Barfoed. Árið 2016 tók flokkur hans þátt í ríkisstjórnarsamstarfi og gegndi Søren embætti dómsmálaráðherra til ársins 2019 þegar ný ríkisstjórn tók við völdum í Danmörku.
Danski íhaldsflokkurinn er einn nánasti samstarfsflokkur Sjálfstæðisflokksins og vinatengsl meðal forystumanna þeirra. Það var því mikið áfall þegar fréttir bárust af andláti Sørens. Þórður Þórarinsson framkvæmdastjóri Sjálfstæðisflokksins kynntist Søren vel. Hann minnist öflugs stjórnmálaforingja sem tekist hafði að sameina Íhaldsflokkinn, en flokkurinn átti í afar miklum vandræðum er Søren tók við vegna langvarandi deilna innan hans. Søren var einkar vinalegur maður og hlýr. Ávallt brosmildur og sýndi viðmælendum sínum áhuga. Spurði jafnan um þeirra hagi frekar en að ræða sína. Søren var mikill persónuleiki og þegar hann gekk inn í fundarherbergið breyttist stemningin. Til hins betra jafnan. Ekki af því að hann tæki svo mikið til sín heldur vegna sjarma hans og sterkrar nærveru.
Sjálfstæðisflokkurinn kveður góðan vin og öflugan stjórnmálamann sem fór fyrir lífsskoðun og stjórnmálastefnu sem er nálægt þeirri sem sjálfstæðismenn berjast fyrir.