Þingmenn Sjálfstæðisflokksins hafa lagt fram frumvarp um endurskoðun á rekstrarumhverfi fjölmiðla.
Frumvarpið kveður meðal annars á um formbeytingu á rekstri Ríkisútvarpsins þannig að opinbert hlutafélag um Ríkisútvarpið verði lagt niður og til verði ríkisstofnun á fjárlögum með sjálfstæða stjórn.
Jafnframt verði skattalegar ívilnanir fyrir sjálfstæða fjölmiðla innleiddar í stað beinna ríkisstyrkja og skorður settar við samkeppnisrekstri Ríkisútvarpsins sem verði m.a. ekki heimilt að afla tekna með kostun dagskrárefnis.
„Með frumvarpinu viljum við jafna stöðuna á fjölmiðlamarkaði, draga úr forréttindum ríkisfjölmiðils og styrkja stöðu sjálfstæðra fjölmiðla,“ segir Óli Björn Kárason, þingmaður og fyrsti flutningsmaður frumvarpsins.
„Við þurfum að viðurkenna að það voru mistök að gera Ríkisútvarpið að opinberu hlutafélagi. Þá ætti öllum að vera ljóst að fyrirkomulag fjármögnunar með álagningu útvarpsgjalds er óeðlileg. Klippt hefur verið á milli fjármögnunar og þróunar rekstrarkostnaðar vegna lögbundinna verkefna,“ segir Óli Björn jafnframt.
Í greinargerð með frumvarpsinu kemur fram að fjárveitingar til Ríkisútvarpsins ráðist af fjölda skattgreiðenda á aldrinum 16 til 67 ára, fjölda lögaðila og fjárhæð útvarpsgjalds en á móti kemur sé hlutverk og þjónusta Ríkisútvarpsins nánast sú sama – óháð fjölda skattgreiðenda hverju sinni. Auknar tekjur Ríkisútvarpsins, vegna fjölgunar greiðenda útvarpsgjalds, eru því í engu samræmi við þær skyldur sem á þeim hvílir að mati þingmanna Sjálfstæðisflokks.