Kjartan Magnússon, borgarfulltrúi Sjálfstæðisflokksins í Reykjavík:
Frumvarp að fjárhagsáætlun Reykjavíkurborgar fyrir árið 2024 sýnir að meirihluti Samfylkingar, Framsóknarflokks, Pírata og Viðreisnar hefur engin tök á fjármálum borgarinnar. Reksturinn er ekki sjálfbær og stendur borgin frammi fyrir miklum skuldavanda. Samt hyggst vinstri meirihlutinn halda áfram að safna skuldum og er áætlað að þær verði orðnar 515 milljarðar króna í árslok 2024.
Hvað er til ráða? Borgarstjórn verður að ná samstöðu um raunverulegar aðgerðir til að koma rekstrinum í jafnvægi og stöðva skuldasöfnun.
Þegar rekstur borgarinnar er skoðaður sést að víða er bruðlað og hægt væri að ná miklum árangri við sparnað og hagræðingu ef vilji væri fyrir hendi.
Yfirstjórn Reykjavíkurborgar gæti byrjað að spara hjá sjálfri sér enda hefur kostnaður við hana aukist mjög á undanförnum árum. Víða væri hægt að hagræða í yfirbyggingu Reykjavíkurborgar án þess að það kæmi niður á þjónustu við íbúa.
Aukin yfirbygging
Ekki kemur á óvart að erfiðlega gangi að spara víða í borgarkerfinu þegar hvergi er sparað í yfirstjórninni og kostnaður þar eykst ár frá ári. Eftir höfðinu dansa limirnir.
Áætlað er að kostnaður við rekstur miðlægrar stjórnsýslu borgarinnar muni nema 2.279 milljónir króna á árinu 2024, og aukast þannig um 18% á milli ára.
Áætlað er að kostnaður við skrifstofu borgarstjóra og borgarritara hækki um 22% á komandi ári, fari úr 577 milljónum króna í 704 milljónir. Kostnaður við „samskiptamál“ mun meira en tvöfaldast, fer úr 84 milljónum króna í 190 milljónir. Þá á að verja 91 milljón króna í „markaðs- og viðburðamál“, sem er nýr útgjaldaliður á skrifstofu borgarstjóra. Nýr borgarstjóri virðist því ætla að láta til sín taka í samskiptum, viðburðum og markaðssetningu á komandi ári.
Kostnaður við rekstur skrifstofu borgarstjórnar mun samkvæmt frumvarpinu hækka um 28% á milli ára og því kosta um 804 milljónir á næsta ári. Þar af mun kostnaður við „meðferð borgarmála“ nema 649 milljónum króna og hækka um 33% á milli ára. (Tölur eru á áætluðu verðlagi hvers árs.)
Fjölmenn borgarstjórn
Fjárveitingar til skrifstofu borgarstjórnar eru að meginstefnu nýttar í launakostnað kjörinna fulltrúa, þ.e. 23 borgarfulltrúa og átta varaborgarfulltrúa. 31 fulltrúi er því á fullum launum við að sinna borgarmálum, sem er langtum meiri fjöldi en þekkist á Vesturlöndum í borgum af svipaðri stærð og Reykjavík. Augljóst er að mikil hagræðing næðist með því að fækka borgarfulltrúum á ný, t.d. í fimmtán eins og tíðkaðist lengi vel. Að auki yrði verulegur afleiddur sparnaður af slíkri breytingu því hún myndi draga úr umfangi og flækjustigi annars staðar í borgarkerfinu.
Til að unnt sé að fækka borgarfulltrúum þarf lagaheimild frá Alþingi. Borgarfulltrúar Sjálfstæðisflokksins hafa hvað eftir annað lagt til að borgarstjórn beiti sér fyrir slíkri breytingu en hingað til hafa slíkar tillögur verið felldar af vinstriflokkunum.
Með því að beita sér fyrir fækkun borgarfulltrúa myndi borgarstjórn sjálf ganga á undan með góðu fordæmi varðandi þá víðtæku hagræðingu sem þarf að eiga sér stað í borgarkerfinu.
Greinin birtist í Morgunblaðinu 23. nóvember 2023.