Táknmynd fyrir stefnu jafnréttis, frelsis og framfara

„Hún var táknmynd fyrir þá stefnu jafnréttis, frelsis og framfara sem hefur einkennt flokkinn okkar allar götur síðan,“ segir Bjarni Benedktsson, formaður Sjálfstæðisflokksins og fjármála- og efnahagsráðherra, á facebook-síðu sinni í dag um Auði Auðuns, en 110 ár eru í dag frá fæðingu hennar.

„Auður var Sjálfstæðiskona og brautryðjandi á ótal mörgum sviðum. Hún lauk laganámi fyrst íslenskra kvenna árið 1935, varð borgarstjóri í Reykjavík fyrst kvenna 1959 og fyrsta íslenska konan í ráðherrastól þegar hún tók við embætti dóms- og kirkjumálaráðherra í október 1970.

Ekkert af þessu þótti sjálfsagt í þá daga. Auður ruddi brautina fyrir fjölda framúrskarandi stjórnmálakvenna sem á eftir fylgdu, bæði í Sjálfstæðisflokknum og annars staðar,“ segir Bjarni þegar hann minnist þessa merka brautryðjanda og baráttukonu.

„Hugsunarháttur eins og hann gerist bestur“

,,Ég er alin upp í borgaralegum hugsunarhætti eins og hann gerist beztur og fellur hann saman við stefnuyfirlýsingu míns flokks, Sjálfstæðisflokksins. Hann felst í virðingunni fyrir einstaklingnum og frjálsræði hans og þeirri ábyrgðartilfinningu, sem hver einstaklingur þarf að hafa,” sagði Auður Auðuns í viðtali við Morgunblaðið árið 1983.

Auður fæddist á Ísafirði 18. febrúar 1911. Auður lauk sem fyrr segir stúdentsprófi frá Menntaskólanum í Reykjavík vorið 1929. Hún lauk svo embættisprófi í lögfræði frá Háskóla Íslands árið 1935, fyrst kvenna. Auður tók sæti í bæjarstjórn Reykjavíkur árið 1946 og varð forseti bæjarstjórnar 1954 til 1970 — fyrst kvenna. Hún var borgarstjóri Reykjavíkur í eitt ár, 1959-1960, fyrst kvenna. Hún var alþingismaður Reykvíkinga árin 1959 til 1974.

Auður var löngum eina konan í stjórnmálastarfi á Íslandi. „Ég vandist því með árunum að vera oftast ein með karlahópnum.“ sagði Auður í viðtali við kvenréttindablaðið 19. júní árið 1971. Auður lést árið 1999, þá 88 ára.

Sjá nánar um ævi Auðar Auðuns á vef Alþingis – hér.