Egill Þór Jónsson borgarfulltrúi:
Sveitarfélög sinna ýmsum verkefnum og leggja sitt af mörkum við að tryggja sem bestu þjónustuna. Um þetta ríkir ákveðin samfélagssáttmáli: Borgarbúar greiða útsvar og þiggja í staðinn ýmsa þjónustu frá sveitarfélaginu. Fyrir borgarbúa skiptir fyrst og fremst máli að þjónustan sé öflug og biðin eftir henni sé stutt, burtséð frá því hver innir hana af hendi.
Pólitískar stefnur setja mark sitt á þau verkefni sem meirihlutavaldhafar standa frammi fyrir. Einn grundvallarmunur á pólitískum stefnum er ólík sýn á rekstrarform þjónustunnar. Rekstrarformi þjónustu er gjarnan stillt upp á móti hvoru öðru í umræðunni: Einkaframtakið gegn hinu opinbera. Oft festist umræðan í skotgröfunum, þ.e. þessum gagnstæðu pólum, og minni tími fer í að ræða lausnir á vandamálunum, sem oftar en ekki eru fólgin í biðlistum.
Biðlistar frekar en lausnir
Þegar litið er til margvíslegrar þjónustu borgarinnar með gagnrýnum augum má fljótt sjá hvar tækifærin liggja og úrbóta er þörf. Sjálfstæðisflokkurinn hefur ítrekað lagt fram tillögur um að fé fylgi barni í grunn- og leikskóla, óháð rekstrarformi þjónustunnar. Tillögurnar hafa allar verið felldar. Auk þess hafa tillögur um hækkun niðurgreiðslna til dagforeldra vegna barna 18 mánaða og eldri ítrekað verið lagðar fram, en felldar. Sú tillaga miðast að því að kostnaður foreldra sem hafa börn í dagvistun hjá dagforeldi og þeirra sem hafa hlotnast pláss í leikskólum borgarinnar sé á pari.
Tilvalið væri að nýta einkaframtakið betur við skólaþjónustu borgarinnar. Í núverandi leikskólakerfi eru biðlistar þekkt vandamál. Í stað þess að hlusta á réttmæta gagnrýni og tillögur að langtímalausnum og horfast í augu við vandamálið er það pólitísk ákvörðun sitjandi meirihluta að hlusta ekki. Með því er auknum sveigjanleika í þjónustu Reykjavíkurborgar hafnað og þar af leiðandi skerðist valfrelsi borgarbúa um þjónustu borgarinnar. Fjölmargir foreldrar, sem sjá ekki fram á að fá leikskólapláss fyrir börnin sín fyrir tveggja ára aldur, eiga erfitt með að samþykkja þessa pólitík.
Vannýtt tækifæri í velferðarþjónustu
Biðlistar eftir velferðarþjónustu og stoðþjónustu borgarinnar eru víðast hvar mjög langir. Ótal tækifæri eru fólgin í því að útvista einhverjum af þeim verkefnum sem borgin sinnir. Það gæti dregið úr álagi á þjónustustofnunum borgarinnar og á sama tíma aukið þjónustu við borgarbúa. Hugmyndin um að fé fylgi þjónustuþega ætti að opna á möguleika einkaframtaksins í þjónustu við borgarbúa með góðum árangri og bættri þjónustu.
Undirritaður lagði fram tillögu í velferðarráði í vikunni sem lýtur að því að skoða þá möguleika sem í boði eru til útvistunar á þjónustunni. Tillagan er lögð fram með það að markmiði að stytta biðlista, bæta og auka skilvirkni í þjónustu og hugsanlega auka hagkvæmni í rekstri velferðarsviðs. Sé markmiðið að setja borgarbúa í fyrsta sæti umfram annað er erfitt að sjá slíka tillögu fellda af meirihlutanum í borgarstjórn.
Fyrir borgarbúa sem greiða útsvar sitt til sveitarfélagsins skiptir fyrst og fremst máli að veitt þjónusta sé öflug og biðin eftir henni stutt. Þess vegna er nauðsynlegt að borgin opni augu sín fyrir aðilum á einkamarkaði svo unnt sé að grynnka á biðlistunum.
Greinin birtist í Morgunblaðinu 21. janúar 2021.