Samband ungra sjálfstæðismanna fagnar 90 ára afmæli í dag, en sambandið var stofnað í Hvannagjá á Þingvöllum þann 27. júní 1930. Fyrsti formaður SUS var kjörinn Torfi Hjartarson, en núverandi formaður sambandsins er Halla Sigrún Mathiesen.
Til að fagna afmælinu gaf SUS út veglegt afmælisrit í dag sem fylgdi Morgunblaðinu en þar er farið yfir sögu sambandsins og greinar birtar eftir núverandi og fyrrverandi félaga og viðtöl sem verða birt hér á xd.is næstu daga, m.a. viðtal við Áslaugu Örnu Sigurbjörnsdóttur dómsmálaráðherra.
„Ungur sjálfstæðismenn hafa í gegnum tíðina sýnt það og sannað að það getur reynst mikið gæfuspor að hlusta á það sem ungt fólk hefur fram að færa, þó svo að það kunni að hljóma róttækt fyrst um sinn,“ segir Halla Sigrún formaður SUS í leiðara í blaðinu.
„SUS hefur alla tíð lagt sitt á vogarskálarnar í baráttunni fyrir einstaklingsfrelsinu, markaðshagkerfinu, mannréttindum og réttarríkinu. Þeirri baráttu eigum við margt að þakka, enda lagði hún grunninn að þeim sögulegu lífsgæðum sem við búum við í dag,“ segir enn fremur í leiðara formanns.
Blaðið má nálgast rafrænt hér.