Vilhjálmur Bjarnason, form. Hagsmunasamtaka heimilanna

Vilhjálmur Bjarnason, ekki fjárfestir, er fæddur og uppalinn á Reyðarfirði en flutti á höfuðborgarsvæðið rúmlega tvítugur að aldri og býr með fjölskyldu sinni í Mosfellsbæ.  Hann er giftur Önnu Thelmu Magnúsdóttur, viðskiptafræðingi og eiga þau 6 börn á aldrinum sjö til tuttugu og átta ára og hundinn Dimmu.
Vilhjálmur er löggiltur fasteignasali og hefur verið í stjórn Hagsmunasamtaka heimilanna síðastliðin sex ár, þar af þrjú sem formaður.  Hann hefur sterka réttlætiskennd og vill leggja sitt af mörkum til að gera íslenskt þjóðfélag betra. Aðaláherslumál hans er afnám verðtryggingar á neytendalán heimilanna og hefur hann unnið ötullega að þeim málaflokki síðustu ár.

  • Sækist eftir 2-3. sæti í Suðvesturkjördæmi
  • Starfsheiti: Ekki fjárfestir

Þetta er einfalt.

Einstaklingur í Osló tekur 40 ára íbúðalán að verðmæti 26 milljónir og skv. útreikningum bankans mun hann greiða 40 milljónir til baka.

Einstaklingur í Reykjavík tekur á sama tíma 40 ára íbúðalán að upphæð 26 milljónir og skv. útreikningum bankans getur hann búist við að greiða 454 milljónir tilbaka miðað við verðbólgu síðustu 10 ára á undan.

Þetta er raunveruleikinn sem Íslendingar hafa þurft að búa við alltof lengi.  Einstaklingurinn í Osló velur hinsvegar að taka lánið til styttri tíma og eftir um 25 ár er lánið uppgreitt og þar að auki hefur hann eignast fjallakofa, tvo bíla skuldlaust, bát inn í firði og erfanlegan séreignarlífeyrissparnað.  Einstaklingurinn í Reykjavík er hinsvegar ennþá að greiða af láninu eftir 25 ár, er með bíl á bílalánum og fer í sumarfrí með fjölskylduna á kreditkortinu.

Það er einfalt að breyta þessu, það þarf eingöngu að afnema verðtrygginguna af lánum heimilanna og þá leið þekki ég. Verðtrygging á milli fagfjárfesta og ríkisins þarf aftur á móti að vera – eins og er í öllum þeim löndum sem við miðum okkur við – til þess að þessir aðilar sjái hag sinn í að halda verðbólgunni í skefjum. Þessvegna býð ég mig fram í annað til þriðja sætið á framboðslista Sjálfstæðismanna í Suðvesturkjördæmi.

Ég veit að hinn venjulegi sjálfstæðismaður er ekki sáttur við hvernig komið er fyrir heimilum landsins og hvernig gæðum þess er skipt. Hann vill breytingar alveg eins og hinn venjulegi Íslendingur. Ég stíg því fram fyrir börnin mín og komandi kynslóðir og vil allt gera sem í mínu valdi stendur til að breyta þessu. Ég vel að vinna að þessum málum undir grunngildum og grunnstefnu Sjálfstæðisflokksins þannig að þörfum heimilanna sé mætt og tryggt að hægt sé að lifa góðu og mannsæmandi lífi í okkar auðuga og gjöfula landi.

Það er einfalt. Ef þú vilt breytingar og lifa við sambærileg kjör og íbúar hinna Norðurlandanna, þá mætir þú í prófkjör okkar Sjálfstæðismanna og setur mig í annað til þriðja sætið!

 

>