Herdís Anna Þorvaldsdóttir

Ég er formaður Efnahags- og viðskiptanefndar Sjálfstæðisflokksins og er fulltrúi flokksins í stjórn Hverfisráðs Grafarvogs auk annara trúnaðarstarfa í ráðum og stjórnum á vegum flokksins.
Ég vil leggja mitt af mörkum til að stuðla að frelsi einstaklingsins til orðs og athafna og auknum valmöguleikum og sveigjanleika á öllum sviðum þjóðfélagsins.

Ég er fulltrúi Sjálfstæðisflokksins í stjórn Hverfisráðs Grafavogs og varamaður í Umhverfis- og skipulagsráði, Menningar- og ferðamálaráði og Skóla- og frístundaráði Reykjavíkur. Ég var kjörin formaður Efnahags- og viðskiptanefndar Sjálfstæðisflokksins og er í stjórn Hvatar, félagi sjálfstæðiskvenna í Reykjavík og framkvæmdastjórn Landsambands Sjálfstæðiskvenna. Eiginmaður minn er Haukur Þór Adólfsson, pípulagningameistari og við búum í Grafarvogi ásamt þremur börnum.

Ég er framkvæmastjóri þyrluþjónustunnar Helo og hef verið það undanfarin fjögur ár. Ég hef víðtæka reynslu af atvinnulífinu. Ég er formaður flugnefndar SAF, Samtaka ferðaþjónustunnar, er í stjórn Reykjavik International School og sat í ráðgefandi stjórn Valamed ehf. (sem er sprotafyrirtæki á heilbrigðissviði). Ég er með MBA, meistaragráðu í viðskiptastjórnun frá Háskólanum í Reykjavík og útskrifaðist með diplóma í alþjóðaviðskiptum frá sama skóla, ég er einnig menntaður tækniteiknari. Ég var í gæðaráði MBA námsins, var formaður stjórnar Embla, félags kvenna með MBA frá HR og hef stýrt fjáröflunaruppboði fyrir UN Women. Þá hef ég unnið margvísleg verkefni tengd markaðssetningu og stefnumótun og vann fyrir utanríkisráðuneytið að sérverkefni tengt þátttöku Íslands í heimssýningum.

Mín helstu hugðarefni tengjast lífreynslu minni, menntun og stöðu. Ég er móðir barna á mismunandi aldri og rek fyrirtæki í ferðaþjónustu. Ég tel það vera lykilatriði að viðskiptaumhverfið sé einfalt og aðgengilegt og að fyrirtæki og einstaklingar njóti frelsis til orðs og athafna. Við eigum að halda áfram að einfalda skattkerfið og létta af tollum og skapa hvetjandi umhverfi en ekki íþyngjandi. Ég vil stuðla að aukinni samkeppnishæfni íslensks atvinnulífs og laða að okkur spennandi atvinnutækifæri og mannauð. Við þurfum að halda áfram uppbyggingu innviða, vanda okkur við forgangsröðun í samgöngum með umferðaröryggi í forgrunni og auka valfrelsi í mennta- og heilbrigðismálum. Ég vil auka sveigjanleika í lífeyriskerfinu og endurskoða tekjutengingar. Þá legg ég áherslu á sjálfbærni í umgengni okkar við umhverfið og náttúruna.