Sjálfstæðisflokkurinn og Vinstri hreyfingin grænt framboð hafa endurnýjað málefnasamning um meirihlutasamstarf í bæjarstjórn Mosfellsbæjar á komandi kjörtímabili. Samningurinn var undirritaður sl. þriðjudag.
Mosfellsbær er 7. stærsta sveitarfélag landsins og er hluti af Suðvesturkjördæmi. Þar bjuggu 10.566 íbúar þann 1. janúar 2018. D-listinn fékk fjóra fulltrúa kjörna í bæjarstjórn og V-listi fékk einn fulltrúa, en bæjarstjórnin er skipuð alls níu bæjarfulltrúum. Meirihlutasamstarf listanna hófst árið 2006.
„Með okkar góðu gildi að leiðarljósi, virðingu – jákvæðni – framsækni og umhyggju eru okkur allir vegir færir. D- og V- listi hafa verið við stjórnvölinn undanfarin 12 ár og á þeim tíma hefur samfélagið eflst og þjónustan tekið stakkaskiptum. Við ætlum að halda áfram á sömu braut, gera enn betur og sjá til þess að áfram sé best að búa í Mosfellsbæ,“ segir Haraldur Sverrisson, bæjarstjóri í tilkynningu frá framboðunum.
Oddviti vinstri grænna segir að í samningnum sé talað skýrt í öllum málaflokkum. Að Mosfellingum fjölgi ört og að bæjarfélagið sé reiðubúið að takast á við verkefnin sem stækki með hverju árinu.
Hér má finna ítarlega frétt í Mosfellingi um samstarfið og nánari upplýsingar um bæjarfulltrúa Sjálfstæðisflokksins í Mosfellsbæ má finna hér.